Monday, October 22, 2018

Naibu Waziri Nyongo afanya ziara katika Migodi ya makaa ya mawe ya Kabulo na Kiwira


Na Greyson Mwase,

Tarehe 19 Oktoba, 2018 Naibu Waziri wa Madini, Stanslaus Nyongo alifanya ziara katika Mgodi wa Makaa ya Mawe wa Kabulo (Kabulo Coal Mine) uliopo katika eneo la Kabulo lililopo katika wilaya Songwe mkoani Songwe na Mgodi wa Makaa ya Mawe wa Kiwira (Kiwira Coal Mine) iliopo katika Wilaya ya Ileje mkoani Mbeya. Mara baada ya kufanya ziara katika migodi husika, alizungumza na wafanyakazi wa Mgodi wa Makaa ya Mawe wa Kiwira lengo likiwa ni kusikiliza na kutatua changamoto mbalimbali zinazowakabili.

Akizungumza katika mkutano wa wafanyakazi alisema kuwa, kwa sasa Serikali imetenga fedha kwa ajili ya ukarabati wa barabara ya kutoka Kabulo hadi Kiwira itakayotumika kwa ajili ya usafirishaji wa makaa ya mawe pamoja na kuhakikisha inalipa stahili za wafanyakazi mara baada ya taratibu kukamilika. Katika hatua nyingine, Nyongo aliwataka watumishi kufanya kazi kwa ubunifu na kusisitiza kuwa Wizara ya Madini itahakikisha wanafanya kazi katika mazingira mazuri.

Wafanyakazi wa Mgodi wa Kiwira walimpongeza Naibu Waziri Nyongo kwa kazi kubwa ya kusikiliza na kutatua kero za wachimbaji wa madini nchini pamoja na Taasisi zilizopo chini ya Wizara.


Meneja Migodi kutoka Shirika la Madini la Taifa (STAMICO), Alphonce  Bikulamchi (katikati) akielezea shughuli za uchimbaji  wa makaa ya mawe zinavyofanyika katika Mgodi wa Makaa ya Mawe wa Kabulo uliopo katika mkoa wa Songwe kwa Naibu Waziri wa Madini, Stanslaus Nyongo (kushoto) 

Kaimu Meneja Mkuu wa Mgodi wa Makaa ya Mawe wa Kiwira uliopo katika wilaya ya Ileje Mkoani Mbeya,  Samwel Kibaranga (kushoto) akimwonesha Naibu Waziri wa Madini, Stanslaus Nyongo (wa pili kushoto) reli inayotumika kwa ajili ya kusafirisha makaa ya mawe (haionekani pichani) 

Naibu Waziri wa Madini, Stanslaus Nyongo (wa tatu kushoto mbele) akitoa maelekezo katika eneo la Mgodi wa Mkaa ya Mawe wa Kiwira 

Naibu Waziri wa Madini, Stanslaus Nyongo (wa tano kushoto mbele) akiwa katika picha ya pamoja na wafanyakazi wa Mgodi wa Makaa ya Mawe wa Kiwira mara baada ya kumalizika kwa mkutano

Tanzania, DRC zaanza mazungumzo ujenzi wa kinu/kiwanda cha kuchenjua Colbat


Asteria Muhozya na Rhoda James, Geita

Serikali ya Tanzania kupitia Wizara ya Madini imeanza kufanya mazungumzo na nchi ya Jamhuri ya Kidemokrasia ya Kongo (DRC) ili iweze kujenga Kiwanda cha Kuchenjua madini ya Colbat nchini.

Hayo yalibainishwa Oktoba 19, mkoani Geita  na Waziri wa Madini wa Tanzania Angellah Kairuki wakati wa kuhitimisha ziara ya siku Nne ya  Waziri wa Madini wa Kongo (DRC), Martin Kabwelulu aliyoifanya nchini kwa mwaliko wa Waziri Kairuki.

Kairuki alisema kuwa, nchi ya Kongo ndiyo mzalishaji mkubwa wa madini ya Colbat duniani ambapo asilimia 70 ya madini hayo duniani yanazalishwa nchini humo.

Aliongeza kuwa, kwa sasa nchi hiyo inayo changamoto ya kusafirisha madini hayo yakiwa ghafi ikiwemo ukosefu wa umeme wa kutosheleza kwa ajili ya ujenzi wa viwanda hivyo.

“Tumekubaliana kuendelea na mazungumzo  na Kongo ili shughuli za uchenjuaji na uyeyushaji wa madini hayo ufanyike nchini  kwa kuwa tumeshaanza kuwekeza kwenye Vinu/viwanda  vya Kuchenjua na kuyeyusha madini mbalimbali. Hivyo, tunataka wayasafirishe makinikia ya Colbat hapa na tuyachenjue hapa,” alisisitiza Kairuki.

Akizungumzia matumizi ya madini hayo, Kairuki alisema kuwa, madini ya Colbat yanatumika kutengeneza betri na vihifadhi nishati (capacitor) ambazo zinahitajika sana hususan, kwenye magari yanayotumia umeme.

Mbali na makubaliano ya ujenzi wa kiwanda hicho, pia Waziri Kairuki alisema kuwa nchi hizo zimekubaliana masuala kadhaa ikiwemo kuendelea kubadilishana uzoefu wa usimamizi wa sekta ya Madini ili kuweza kunufaisha wananchi hasa wale wanaozunguka maeneo ya migodi.

“Nchi ya Kongo DRC imefurahishwa na hatua za Mkoa wa Geita kwenye usimamizi wa mapato yatokanayo na madini pia mchango wa migodi kwa maendeleo ya wananchi wanaozunguka mgodi,”alisema Kairuki.

Vilevile, alisema kuwa nchi hizo zimekubaliana kuboresha mahusianao ya kimkakati ambapo Kongo imeahidi kuiunga Mkono Tanzania katika masuala ya Mashtaka dhidi ya makampuni za uwekezaji.

Pia, alisema Kongo imeahidi kukitumia Chuo Cha Madini Dodoma (MRI) kupata mafunzo mbalimbali yanayohusu sekta ya madini yanayotolewa kituoni hapo;

“Kongo imepanga kuja kujifunza mfumo mpya wa utoaji wa leseni za madini (cadaster) ambao umebuniwa na kusanifiwa na watanzania,” alisema Kairuki.

Kairuki aliongeza kuwa, nchi hizo zimekubaliana kuendelea kuboresha mifumo ya udhibiti utoroshaji wa madini yanayotoka Kongo na Tanzania kwa manufaa ya nchi zote mbili.

Aidha, Waziri Kairuki alitumia fursa hiyo kuwakaribisha wawekezaji wa Kongo wenye nia ya kuwekeza nchini kwenye migodi, viwanda vya uchenjuaji, uongezaji thamani madini (ukataji, unga’rishaji).

“Lakini pia tumewakaribisha kutumia bandari yetu kupitisha madini yao pamoja na kukubaliana kuwa na Mining Forum kati ya nchi hizi mbili tu ukiachia Forum nyingine ambazo tumelenga kuziandaa na kushirikisha wadau kutoka nchi mbalimbali,” alisema Kairuki.

Aidha,  alisema nchi hiyo imeahidi kurudi nchini  katika kipindi kifupi kijacho kwa ajili ya kujifunza zaidi kuhusu namna Taasisi ya Jiolojia na Utafiti wa Madini Tanzania (GST)  inavyofanya kazi zake za utafiti na maabara.

Kwa upande wake, Waziri wa DRC, Martin Kabwelulu alisema atawatuma Wataalam wake kurudi nchini kwa ajili ya kujifunza mfumo mpya wa utoaji wa leseni za madini (cadaster) wa Tanzania na kuongeza ni mfumo mzuri ambao utaliwezesha taifa hilo kusimamia vema rasilimali madini na kuhakikisha kwamba zinawanuifaisha wananchi wake.

Pia, alisema kuwa nchi hiyo inao ukosefu wa umeme wa kutosha jambo ambalo linafanya nchi hiyo kusafirisha madini hayo nje yakiwa ghafi ikiwemo madini ya Colbat na dhahabu na kuongeza kuwa, Rais wa nchi  hiyo, Joseph Kabila katika ujumbe wake amemweleza kuwa, anataka madini yote ya Kongo yasafirishwe kupitia Tanzania.

“Tunataka tusafirishe madini yetu kupitia bandari ya Tanzania. Lakini pia nimeona njia ya kupitishia madini yetu kupitia reli ya Kati ya Kigoma –Dar es Salaam ni fupi sana,” alisema Kabwelulu.

Akizungumzia mabadiliko ya Sheria ya Madini yaliyofanywa nchini humo hivi karibuni, alisema nchi hiyo iliamua kubadili sheria yake kutokana na kutokunufaika kabisa na rasilimali hiyo hususan kwa wananchi wanaozungukwa na  rasilimali hizo na kuongeza kuwa, sheria ya sasa inapigania zaidi maslahi ya nchi na wananchi wake.

“Nafurahi nimepokelewa vizuri sana Tanzania, nimejifunza mengi kweli hii ni nchi rafiki. Sisi tunao uzoefu wa miaka mingi kwenye sekta hii lakini bado hatujanufaika kabisa,” alisema Kabwelulu.

Naye, Mkuu wa Mkoa wa Geita, Mhandisi Robert Luhumbi alisema kuwa, amemwomba Waziri wa Madini wa Kongo kujenga kiwanda cha Colbat nchini kwa kuwa nchi hiyo iko jirani sana na mkoa huo na kwamba mkoa huo umejipanga kwa mazingira ya uwekezaji mkubwa.

Akiwa nchini, Waziri Kabwelulu alipata fursa ya kukutana na Menejimenti ya Wizara ya Madini na Taasisi zake ambapo pande zote zilibadilishana uzoefu wa namna zinavyosimamia sekta ya madini, ikiwemo masuala ya uchimbaji mdogo wa madini.

Aidha, Waziri Kabwelulu na mwenyeji wake Waziri Kairuki walitembelea Mgodi wa Mfano wa Lwamgasa ambao umejengwa mahsusi kupitia Mradi wa Usimamizi Endelevu wa Rasilimali Madini (SMMRP) unaosimamiwa na wizara. Lengo la mgodi huo ni kutoa elimu kwa wachimbaji wadogo kuhusu uchimbaji sahihi  na uchenjuaji bora wa madini dhahabu. Pia, walitembelea migodi ya Wachimbaji wa Kati inayomilikiwa na watanzania ya Buswola  Mining Ltd na Nsangano Gold Mine mkoani Geita kujifunza walikotokea katika uchimbaji mdogo hadi kuwa wa Kati na pia walitembelea mgodi wa Almasi wa Mwadui (WDL) mkoani Shinyanga.

Ziara ya Waziri Kabwelulu nchini ililenga katika kubadilishana uzoefu na utaalamu katika masuala ya uendelezaji na usimamizi wa Sekta ya Madini ikiwemo kuimarisha zaidi ushirikiano  uliopo baina  ya hizo mbili, kuangalia fursa za ushirikiano wa kibiashara na kiuwekezaji kupitia rasilimali madini madini, kubadilishana uzoefu kuhusu Mabadiliko ya Sheria  za  Madini yaliyofanywa na nchi hizi mbili hivi karibuni pamoja na kudumisha undugu na urafiki baina ya nchi hizo mbili.


Waziri wa Madini wa  Angellah Kairuki na Mgeni wake Waziri wa Madini wa Jamhuri ya Kidemokrasia ya Kongo (DRC) Martin Kabwelulu (Wa tatu kushoto) wakiangalia madini ya Dhahabu yanayozalishwa na kuchenjuliwa katika Mgodi wa Nsangano Gold Mine mkoani Geita walipoutembelea mgodi huo. 

Waziri wa Madini Angellah Kairuki na Waziri wa Madini wa Jamhuri ya Kidemokrasia Kongo (DRC) Martin Kabwelulu wakiangalia Kitabu kinachotunza uzalishaji wa madini ya Almasi katika Mgodi wa Almas Mwadui (WDL) Kitabu hicho kina kumbukumbu za uzalishaji wa tangu mwaka 1958. Anayeshuhudi ni Mkuu wa Mkoa wa Shinyanga,  Zainab Tellack. 

Waziri wa Madini Angellah Kairuki na mgeni wake Waziri wa Jamhuri ya Kidemokrasi ya Kongo (DRC) Martin Kabwelulu (wa pili kushoto) wakimsikiliza Mtaalam Mwelezi  Martin Sezinga Akiwaonesha mashine mbalimbali zinazotumiwa katika hatua mbalimbali za uzalishaji na uchenjuaji wa madini ya dhahabu katika mgodi wa mfano wa Lwamgasa. 

Waziri wa Madini Angellah Kairuki (kushoto) na Waziri wa  Madini wa Jamhuri ya Kidemokrasia ya Kongo (DRC), Martin Kabwelulu wakiteta jambo baada ya kutembelea mgodi wa Busolwa Mining Ltd unaomilikiwa na Mtanzania, mkoani Geita.

Waziri wa Madini Angellah Kairuki na mgeni wake Waziri wa Jamhuri ya Kidemokrasia ya Kongo (DRC) Martin Kabwelulu pamoja na ujumbe walioambatana nao wa Mkoa wa Shinyanga wakiangalia namna shughuli mbalimbali za uzalishaji wa madini ya Almasi  katika Mgodi wa Almasi Mwadui (WDL) zinavyofanyika. 

Waziri wa Madini Angellah Kairuki na Waziri wa Jamhuri ya Kidemokrasia ya Kongo (DRC) Martin Kabwelulu, wakimsikiliza Mtaalam kutoka Mgodi wa Almasi wa Mwadui (WDL) wakati akiwaeleza namna shughuli za uchimbaji wa madini hayo zinavyofanyika.

Friday, October 19, 2018

Serikali yapiga marufuku usafirishwaji wa kaboni kutoka mkoa mmoja kwenda mwingine


Na Greyson Mwase, Songwe

Serikali kupitia Wizara ya Madini imepiga marufuku usafirishwaji wa kaboni kwa ajili ya kuchenjulia madini ya dhahabu kutoka mkoa mmoja hadi mwingine na kusisitiza kuwa haitasita kumchukulia hatua za kisheria mchimbaji wa madini atakayekiuka agizo hilo.

Agizo hilo limetolewa leo tarehe 18 Oktoba, 2018 na Naibu Waziri wa Madini, Stanslaus Nyongo katika mkutano wake na wachimbaji wadogo wa madini katika kijiji cha Saza kilichopo wilayani Songwe mkoani Songwe ikiwa ni sehemu ya ziara yake ya siku mbili katika mkoa huo yenye lengo la  kukagua shughuli za uchimbaji wa madini,  kusikiliza na kutatua kero za wachimbaji wa madini.

Katika ziara yake Nyongo aliambatana na Mkuu wa Wilaya ya Songwe,  Samwel Jeremeah, Afisa Madini Mkazi katika Mkoa wa Mbeya, Sabai Nyansiri, Afisa Madini anayesimamia wilaya za Songwe na Chunya, Athuman Kwariko, Maafisa Madini kutoka Ofisi ya Afisa Madini Mkazi Mkoa wa Mbeya, Ndege Bilagi na Mhandisi Godfrey Nyanda, vyombo vya ulinzi na usalama vya Wilaya pamoja na waandishi wa habari.

Akizungumza na wachimbaji hao, Naibu Waziri Nyongo alisema kuwa lengo la Serikali kupitia Wizara ya Madini kupiga marufuku usafirishwaji wa kaboni kutoka katika mkoa mmoja kwenda mwingine tangu Juni mosi mwaka huu lilikuwa ni kuhakikisha kila mkoa unapata mapato stahiki kupitia ujenzi wa mitambo ya kuchenjua madini kwa kutumia kaboni.

“Kama Serikali tunataka kuhakikisha kila mkoa unajenga mitambo ya kuchenjua madini badala ya kwenda kuchenjulia katika mikoa ya jirani kwa kutumia kaboni na kukosa mapato stahiki,” alifafanua Nyongo.

Alisisitiza kuwa, Serikali haitasita kutaifisha kaboni itakayokamatwa ikisafirishwa kutoka mkoa mmoja kwenda mwingine ikiwa ni pamoja na kuwachukulia wahusika hatua za kisheria.

Akielezea mikakati ya Wizara ya Madini katika kuwasaidia wachimbaji wadogo wa madini, Nyongo alisema kuwa Wizara imeshaanza kutenga maeneo kwa ajili ya wachimbaji wadogo nchini na kuwataka kuunda vikundi na kuomba leseni ili waweze kufanya shughuli zao za uchimbaji wa madini kwa kufuata sheria na kanuni za madini.

Aliongeza kuwa, Wizara ya Madini imeanza kujenga vituo vya umahiri kwa ajili ya kutoa mafunzo kwa wachimbaji wadogo wa madini kuhusu namna bora ya kubaini, kuchimba na kuchenjua madini na kueleza zaidi kuwa moja ya kituo kinachotarajiwa kujengwa ndani ya kipindi cha miezi sita kitakuwa katika Wilaya ya Chunya Mkoani Mbeya.

Aidha, Nyongo aliwataka wachimbaji wadogo kuhakikisha wanalipa mrabaha na kodi mbalimbali zinazotakiwa  Serikalini na  kuwataka maafisa madini nchini kuhakikisha wanasimamia vyema ukusanyaji wa mapato hayo.

Pia, aliwataka wachimbaji wadogo wa madini kuepuka uchenjuaji wa madini kwa kutumia zebaki kwani ina madhara makubwa katika uharibifu wa mazingira na binadamu.

Akielezea namna bora ya usimamizi wa viwanda vitakavyojengwa kwa ajili ya kuchenjua madini ya dhahabu kwa kutumia kaboni, Nyongo alisema mbali na kuhakikisha wamiliki wanakuwa na leseni za uchenjuaji wa madini, wataalam wa mazingira kutoka Wizara ya Madini watapita na kukagua ili kuhakikisha kuwa viwanda vinajengwa katika mazingira mazuri ambayo hayatakuwa na athari katika makazi ya wananchi.

Awali wakizungumza katika mkutano huo kwa nyakati tofauti wachimbaji wadogo waliwasilisha kero mbalimbali ikiwa ni pamoja na ukosefu wa maeneo kwa ajili ya kuendesha shughuli za uchimbaji na uchenjuaji wa madini, ushuru na tozo nyingi, pamoja na kutoshirikishwa katika mikataba baina yao na wawekezaji wakubwa wa madini.


Naibu Waziri wa Madini, Stanslaus Nyongo (katikati) akizungumza na wachimbaji wadogo wa madini katika kijiji cha Saza kilichopo wilayani Songwe mkoani Songwe ikiwa ni sehemu ya ziara yake ya siku mbili katika mkoa huo yenye lengo  la  kukagua shughuli za uchimbaji wa madini,  kusikiliza na kutatua kero za wachimbaji wa madini tarehe 18 Oktoba, 2018. 

Msimamizi wa uchimbaji madini katika Mgodi wa Dhahabu wa Sunshine uliopo katika kijiji cha Mbangala wilayani Songwe mkoani Songwe, Evarist Lukuba (kushoto) akifafanua jambo kwa Naibu Waziri wa Madini, Stanslaus Nyongo (wa tatu kushoto mbele) mara alipofanya ziara katika mgodi huo. 

Meneja Mkuu wa Mgodi wa Dhahabu wa New Luika uliopo katika kijiji cha Mbangala wilayani Songwe mkoani Songwe, Honest Mrema (wa pili kulia mbele) akielezea majukumu ya mgodi huo kwa Naibu Waziri wa Madini, Stanslaus Nyongo pamoja na msafara wake mara alipofanya ziara katika mgodi huo. 

Naibu Waziri wa Madini, Stanslaus Nyongo (mbele) pamoja na msafara wake wakiendelea na ziara katika Mgodi wa Dhahabu wa New Luika uliopo katika kijiji cha Mbangala wilayani Songwe mkoani Songwe. 

Kutoka kushoto, Afisa Madini Mkazi katika Mkoa wa Mbeya, Sabai Nyansiri, na Afisa Madini kutoka Ofisi hiyo, Godfrey Nyanda,    wakinukuu maelekezo yaliyokuwa yanatolewa na Naibu Waziri wa Madini, Stanslaus Nyongo (hayupo pichani) kwenye Ofisi ya Mkuu wa Wilaya ya Chunya. 

Naibu Waziri wa Madini, Stanslaus Nyongo (wa pili kulia) akibadilishana mawazo na Mkuu wa Wilaya ya Chunya, Mary-Prisca Mahundi, (wa pili kushoto) mara baada ya kuwasili katika Wilaya hiyo kabla ya kuanza ziara yake rasmi.

Wachimbaji Madini Songwe waruhusiwa kuendelea na shughuli za uchimbaji madini


Na Greyson Mwase, Songwe

Naibu Waziri wa Madini, Stanslaus Nyongo amewataka wachimbaji wa madini  wanaoendesha shughuli zao za uchimbaji wa madini ya chokaa na ujenzi katika  kijiji cha Nanyala kilichopo katika Wilaya ya Mbozi iliyopo mkoani Songwe kuendelea na shughuli zao wakati wakisubiri  suluhu ya  mgogoro baina yao na kiwanda cha saruji cha Mbeya.

Naibu Waziri Nyongo aliyasema hayo leo tarehe 17 Oktoba, 2018 alipokuwa akizungumza katika mkutano na wachimbaji wadogo  uliofanyika katika kata ya Nanyala wilayani Mbozi mkoani Songwe ikiwa ni sehemu ya ziara yake ya siku mbili katika  mkoa huo  yenye lengo la  kukagua shughuli za uchimbaji wa madini,  kusikiliza na kutatua kero za wachimbaji wa madini.

Katika ziara yake Nyongo aliambatana na Mkuu wa Wilaya ya Songwe, John Palingo, Afisa Madini Mkazi katika Mkoa wa Mbeya, Sabai Nyansiri, Afisa Madini anayesimamia wilaya za Songwe na Chunya, Athuman Kwariko, Afisa Madini kutoka Ofisi ya Afisa Madini Mkazi Mkoa wa Mbeya, Ndege Bilagi, vyombo vya ulinzi na usalama vya wilaya pamoja na waandishi wa habari.

Nyongo alifafanua kuwa, awali maelekezo yalitolewa na Makamu wa Rais, Samia Suluhu Hassan ya kutaka viongozi kutoka katika mikoa ya Mbeya na Songwe kukaa pamoja na kuhakikisha wanamaliza mgogoro wa ardhi kati ya  wakazi wa Songwe na Mbeya na kiwanda cha kuzalisha saruji nje ya mahakama jambo ambalo linafanyiwa kazi kwa sasa.

Alielekeza viongozi kutoka katika mikoa husika kuhakikisha wanashughulikia mgogoro wa ardhi kati ya mikoa miwili na kiwanda cha saruji cha Mbeya kwa wakati huku wananchi wanaojishughulisha na shughuli za uchimbaji madini wakiendelea na shughuli zao kama kawaida katika maeneo husika.

Aliendelea kusema kuwa, jukumu kuu la Wizara ya Madini kupitia Tume ya Madini ni kuhakikisha wanatoa leseni za uchimbaji wa madini kwa kuzingatia sheria na kanuni za madini na kusisitiza kuwa leseni ya uchimbaji wa madini ni tofauti na  hati ya ardhi kwa kuwa inahusisha madini yaliyopo chini ya ardhi.

“Ningependa ieleweke kuwa, leseni ya madini inampa mtu kibali cha kuchimba madini yaliyopo chini ya ardhi ambayo ni tofauti na hati ya ardhi, hivyo wachimbaji wa madini wana haki ya kuendelea na shughuli za uchimbaji wa madini wakati suala la mgogoro wa ardhi likiendelea kushughulikiwa na mamlaka husika,” alisisitiza Nyongo.

Akielezea taratibu za kuchimba madini mara baada ya kupata leseni, Naibu Waziri Nyongo alisema mara baada ya mchimbaji kupata leseni ya uchimbaji wa madini anatakiwa kufika katika Ofisi ya Mkuu wa Wilaya na baadaye kutambulishwa katika Ofisi ya Kijiji ili kukutanishwa na wananchi na kufanya makubaliano ya ulipaji fidia kabla ya kuanza shughuli rasmi za uchimbaji wa madini.

Alisisitiza kuwa, ni lazima wawekezaji wote katika shughuli za uchimbaji wa madini kuhakikisha kuwa wanajitambulisha na kufanya makubaliano na wananchi kabla ya kuanza rasmi kwa uchimbaji wa madini ili kuepuka migogoro ya mara kwa mara.

Katika hatua nyingine, Naibu Waziri Nyongo aliwataka maafisa madini katika mikoa ya Mbeya na Songwe kuendelea na zoezi la kuainisha maeneo kwa ajili ya wachimbaji wadogo wa madini ikiwa ni pamoja na utoaji wa leseni ili uchimbaji wao uweze kuleta tija kwenye uchumi wa nchi.

Aidha, aliongeza kuwa katika maeneo ambayo ni ya hifadhi au vivutio vya utalii leseni zake zifutwe ili kuhakikisha rasilimali za maliasili zinalindwa na kuongeza pato kwenye uchumi wa taifa.

Wakati huohuo Nyongo aliwataka wachimbaji wa madini kuhakikisha kuwa wanalipa kodi mbalimbali  ili fedha hizo ziweze kutumika katika  uboreshaji wa huduma nyingine za jamii kama vile elimu, afya, miundombunu ya barabara.

Pia, Nyongo aliwataka wachimbaji wa madini kuorodhesha kodi na tozo mbalimbali ambazo wanaona ni nyingi na kuziwasilisha katika Wizara ya Madini, ili Wizara iangalie namna ya kuzipunguza na wapate faida zaidi kwenye uchimbaji wa madini.

Awali wakizungumza katika nyakati tofauti wachimbaji hao walieleza changamoto mbalimbali ikiwa ni pamoja na mgogoro wa ardhi baina yao na  kiwanda cha saruji cha Mbeya, uharibifu wa mazingira unaofanywa na baadhi  ya wachimbaji na ukosefu wa maeneo kwa ajili ya uchimbaji wa madini.


Naibu Waziri wa Madini, Stanslaus Nyongo (kulia mbele) na Meneja wa Kiwanda cha chokaa cha Lime Africa kilichopo katika Kata ya Nanyala Wilayani Mbozi Mkoani Songwe, Fredy Msindo (kushoto mbele) pamoja na msafara  wakiendelea na ziara katika eneo la kiwanda hicho ikiwa ni sehemu ya ziara yake ya siku mbili katika mkoa wa Songwe yenye lengo la kusikiliza na kutatua kero za wachimbaji wa madini tarehe 17 Oktoba, 2018. 

Meneja wa Kiwanda cha chokaa cha Lime Africa kilichopo katika Kata ya Nanyala Wilayani Mbozi Mkoani Songwe, Fredy Msindo (katikati) akielezea shughuli zinazofanywa na kiwanda hicho kwa Naibu Waziri wa Madini, Stanslaus Nyongo pamoja na msafara wake. 

Kutoka kushoto Afisa Madini Mkazi katika Mkoa wa Mbeya, Sabai Nyansiri, Afisa Madini kutoka Ofisi ya Afisa Madini Mkazi Mkoa wa Mbeya, Ndege Bilagi na Afisa Madini anayesimamia wilaya za Songwe na Chunya, Athuman Kwariko wakinukuu maelekezo yaliyokuwa yanatolewa na Naibu Waziri wa Madini, Stanslaus Nyongo (hayupo pichani) katika mkutano wake na wachimbaji wadogo uliofanyika katika kata ya Nanyala wilayani Mbozi mkoani Songwe . 

Sehemu ya wachimbaji wa madini ya chokaa na ujenzi kutoka katika kata ya Nanyala wilayani Mbozi mkoani Songwe, wakifuatilia ufafanuzi uliokuwa unatolewa na Naibu Waziri wa Madini, Stanslaus Nyongo (hayupo pichani)


Thursday, October 18, 2018

Hakuna cha msalia mtume usipotekeleza sheria-Profesa Kikula


Na Rhoda James, Singida

Mwenyekiti wa Tume ya madini, Profesa Idris Kikula amesema kutokujua sheria ya madini si kigezo wala sababu ya kukwepa adhabu ya ukiukwaji wa sheria hiyo na kuwataka wachimbaji wa madini kuzingatia na kufuata sheria na taratibu za kujihusisha na biashara hiyo.

Ameyasema hayo jana tarehe 16 October 2018 mkoani Singida alipokuwa katika  kikao na Mkuu wa Mkoa wa Singida, Rehema Nchimbi, Kamati ya ulinzi na usalama ya mkoa huo, viongozi wa wachimbaji wadogo pamoja na baadhi ya wachimbaji wadogo wa Jasi na madini ya dhahabu.

Profesa Kikula ameeleza kuwa, kazi ya tume ni pamoja na kutoa elimu kwa wachimbaji wa madini, Hii ni sababu kubwa ya kuwatembelea siku hii ya leo, “tumewatembelea ili kuwafundisha na kuwakubusha kuhusu sheria zilizopo pamoja na marekebisho ya sheria ya madini ya mwaka 2017”. 

Tunapita ili kutoa elimu katika masuala mbalimbali ikiwa ni pamoja na masuala ya kutuza kumbukumbu, mazingira na usalama migodini, utoaji wa tozo mbalimbali kwa mujibu wa sheria ili tutakapokuja tena awamu nyingine na kukuta mmekiuka taratibu sheria ichukue mkondo wake.

Aidha, Profesa Kikula amewataka wachimbaji wadogo, wa kati na hata wakubwa nchini kuhakikisha kuwa wanakaa pamoja na uongozi wa  wilaya au mkoa husika ili kukubaliana juu ya namna ya uwajibikaji katika kutoa huduma kwa jamii (CSR). 

“Mikataba hii mnayoingia itasaidia kujua ni kiasi gani mnapata, kiasi gani unatakiwa kulipa kuligana na unachokipata ili Serikali ipate stahiki zake. Alisema Profesa Kikula.

Pamoja na hayo,  Profesa Kikula amewasihi viongozi wa wachimbaji wadogo (REMA) kuhakikisha wanashirikiana kwa karibu  na wachimbaji wadogo ili kuhakikisha kuwa wachimbaji hao wanajiunga katika vikundi na kuvirasimisha ili Serikali iwatambue na kuwapa huduma wanayostahili kwa wakati.

Akizungumza katika kikao hicho, Mkuu wa Mkoa wa Singida, Rehema Nchimbi, amewataka viongozi wa mkoa, wilaya, kata na hata vijiji kubadilika na kushiriki katika kutatua matatizo ya wananchi kwa karibu.

Aidha, amewataka , watumishi kujishughulisha kwa juhudi na kujituma pasipo kusubiri kuambiwa jambo la kufanya na badala yake wajifunze kufikiri jambo jema linalohitaji kufanyiwa kazi na kutekeleza kwa wakati ili kupunguza changamoto zinazojitokeza.

Akijibu swali la mchimbaji mdogo wa madini(Jina halikufahamika), aliyehoji  juu ya leseni ya utafiti kuchukua muda mrefu pasipo wananchi kupewa maelezo yoyote Kamishna wa Tume ya Madini Abudulkarim Mruma  alifafanua kuwa leseni ya utafiti inatolewa kwa awamu tatu ambapo awamu ya kwanza inachukua miaka minne, ya pili miaka mitatu na ya tatu miaka miwili kwa mujibu wa sheria ya madini na baada ya hapo kama mchimbaji hajapata chochote anarudisha eneo hilo kwa Serikali.


Mwenyekii wa Tume ya Madini, Prof. Idris Kikula akisaini kitabu cha wageni katika ofisi ya madini mkoani Singida, alipofika kwa ziara ya kikazi ya kukagua na kutoa elimu kwa wachimbaji wadogo, wa kati na wakubwa wa madini kanda ya kati na kanda ya ziwa.
  Kamishna wa Tume ya Madini, Profesa Abdulkarim Mruma( wa tatu kushoto mbele) akichukua taarifa  juu ya maagizo yanayotolewa na Prof. Kikula (hayupo pichani), Kamishna wa Tume ya Madini Athanas Macheyeki (wa nne kushoto) pamoja na wajumbe mbalimbali walioshiriki katika kikao baina ya wadau wa madini na Mkuu wa Mkoa wa Singida, Rehema Nchimbi (hayupo pichani) 
   Kamishna wa Tume ya Madini, Athanas Macheyeki akiwasiliana na Kaimu Afisa Mkazi wa Madini Chone Lugangizya (mwenye koti) na wengine ni wachimbaji wadogo wadogo katika Mgodi wa dhahabu wa Kongo na Mpipitti uliopo katika kijiji cha Mpipiti.
   Kamishna wa Tume ya Madini, Athanas Macheyeki akitoa elimu ya masuala ya madini kwa wachimbaji wadogo wa dhahabu na jasi  katika ukumbi  wa mgodi wa Kongo na mpipiti mkoani Singida
   Muonekano wa mashimo yaliyo katika mgodi wa Kongo na Mpipiti mkoani Singida


    Kamishna wa Tume ya Madini, Athanas Macheyeki akijadili jambo na wachimbaji pamoja na viongozi wa wachimbaji wadogo katika mgodi wa Kongo na Mpipiti uliopo mkoani Singida

    Kamishna wa Tume ya Madini, Athanas Macheyeki akiukagua mgodi wa Kongo pamoja na Mpipiti mara baada ya kikao kilichofanyika katika mgodi huo mkoani Singida.

    Kamishna wa Tume ya Madini, Athanas Macheyeki, akijadili jambo na wachimbaji pamoja na viongozi wa wachimbaji wadogo katika mgodi wa Kongo na Mpipiti uliopo mkoani Singida

         Muonekano wa mgodi wa Kongo na Mpitipiti mkoani Singida

Wednesday, October 17, 2018

Waziri Kairuki akabidhiwa kikombe cha ushindi, maonesho ya viwanda, Geita


Wizara ya Madini ilikuwa Mshindi wa Kwanza katika Taasisi za Serikali zilizoshiriki Maonesho ya Kwanza ya Teknolojia ya Uchimbaji na Uwekezaji wa Madini ya Dhahabu yaliyofanyika Mkoani Geita kuanzia mkoani Geita tarehe 24 – 30 Septemba, 2018.

Maonesho hayo yalifunguliwa kwa niaba ya Waziri wa Madini na Naibu Waziri wa Madini Stanslaus Nyongo na kufungwa na Waziri Mkuu wa Jamhuri ya Muungano wa Tanzania, Kassim Majaliwa.


Waziri wa Madini Angellah Kairuki,  (kushoto) akikabidhiwa Kikombe cha Ushindi na Cheti cha Ushiriki wa wizara katika Maonesho ya Kwanza ya Teknolojia ya Uchimbaji na Uwekezaji wa Madini ya Dhahabu kutoka kwa Katibu Mkuu wa Wizara ya Madini Prof. Simon Msanjila (kulia). Katikati ni Kamishna wa Madini Mhandisi David Mulabwa.

Mwenyekiti Tume ya Madini awaasa wakuu wa wilaya kutatua migogoro sehemu za machimbo


Na. Rhoda James, Manyoni

Mwenyekiti wa Tume ya Madini, Profesa Idris Kikula ameagiza Wakuu wa wilaya inchini kutatua migogoro ya wachimbaji wa  madini inayojitokeza katika maeneo yao ili kuepusha madhara yatokanayo na ucheleweshwaji wa utatuzi wa migogoro hiyo inayopelekea migogoro hiyo kufikishwa katika ngazi za juu.

Profesa Kikula ametoa kauli hiyo leo tarehe 15 October, 2018 wakati alipokuwa kwenye ziara yake katika wilaya ya Manyoni mkoani Singida.

Akizungumza katika kikao hicho, Profesa Kikula aliwaasa Wakuu wa Wilaya kushirikiana na viongozi wa vijiji, viongozi wa kata kuelewa vyema vyanzo vya migogoro sehemu za machimbo pamoja  na kuitatua.

“Tume ya madini haiwezi kutatua migogoro yote nchi nzima, lazima tushirikiane katika hilo ili kuwasaidia wanachi kupata haki yao kwa wakati” alisema Profesa Kikula.

Profesa Kikula aliongeza kuwa, wapo wenyeviti wa wachimbaji wadogo kila mkoa hivyo fanyeni kazi kwa karibu na hao viongozi wa wachimbaji wadogo ili kubaini changamoto zao na kutatua migogoro inayojitokeza. 

Aidha, Profesa Kikula alitoa wito kwa wachimbaji wadogo pamoja na Wakuu wa Wilaya kusoma marekebisho ya sheria ya madini ya mwaka  2017 na kuielewa ili kuwa na uelewa wa uendeshaji wa shughuli za uchimbaji na biashara ya madini.

Akizungumzia lengo la ziara hiyo, Profesa Kikula alisema kuwa ni pamoja na kuangalia usalama wa wachimbaji wadogo, kufuatilia na kujiridhisha na utuzwaji wa kumbukumbu za mapato na tozo mbalimbali, kujiridhisha endapo wachimbaji wanazingatia uchimbaji salama bila kuathiri mazingira pamoja na kufuatilia endapo wachimbaji wanajishughulisha na masuala ya kijamii kama vile kujenga shule, zahanati.

Kwa upande wake Kamishna wa Tume ya madini, Abudulkarim Mruma amewasihi Wakuu wa Wilaya kufatilia taarifa za wachimbaji wadogo ili kujua leseni ya eneo husika inamilikiwa na nani na je ameajiri watumishi wangapi jambo litakalosaidia katika kupunguza na kutatua migogoro itakayojitokeza kwa wakati.

Akizungumzia umuhimu wa utunzwaji wa kumbukumbu kwa wachimbaji wadogo,  Dkt.Athenas Macheyeki Kamishna wa Tume ya madini aliwasisitiza  Wakuu wa Wilaya kuhakikisha kuwa wachimbaji wadogo wanatuza kumbukumbu za uzalishaji na uuzaji ili kujua kiasi sahihi cha uzalishaji na kilichouzwa ili kwa njia hiyo Serikali ijipatie mapato yanayostahili.

Mkuu wa wilaya ya Manyoni, Rahabu Mwagisa alimshukuru Mwenyekiti wa Tume ya Madini, Profesa Kikula kwa ujio wao
Na kuahidi kuwa watatekeleza kwa umakini mkubwa suala la kutatua migogoro maeneo ya wachimbaji  kwa kushirikiana na viongozi wa madini waliopo katika maeneo yao pamoja na viongozi wa wachimbaji wenyewe.

Aidha, aliahidi kupitia kwa upya na kuhakikisha marekebisho ya sheria ya madini ya 2017 ameielewa kikamilifu na kuifanyia kazi katika shughuli za kila siku ili kuhakikisha kuwa kila mwananchi anapata haki yake lakini pia serikali inajipatia mapato yake stahiki.  

Mwagisa alikamilisha hotuba yake kwa kuahidi kuwa  ataendelea kusimamia na kudhibiti suala la utoroshaji wa madini na kuhakikisha kinachopatikana kinauzwa sehemu maalumu lakini baada ya kumbukumbu kuwekwa sawa na tozo stahiki zimewasilishwa ipasavyo.

Kamishna wa Tume, Dkt. Athanas Macheyeki akisalimiana na mmiliki wa mgodi wa General Business and Equipment Suppliars Ltd, Yusufu Kibila wakati alipotembelea mgodi wake wa kuzalisha madini ya Jasi, anayeshuhudia ni Kaimu Afisa Mkazi Chone Lugangizya.

Mmiliki wa Mgodi wa Jasi wa General Business and Equipment suppliers ltd Akitoa maelezo kwa Kamishna wa Tume, Dkt. Athanas Macheyeki katikati pamoja na Kaimu Afisa Mkazi wa Singida, Chone Lugangizya wengine ni wachimbaji wadogo wa Jasi na dhahabu mkoani singida.

Mashine ya kuchimba na kupakua mchanga wa Jasi katika mgodi wa Yusufu Kabila ambao ni General Business and Equipment Suppliers ltd

Mmiliki wa mgodi wa General Business and Equipment Suppliers ltd, Yusufu Kibila akitoa maelezo kwa Kamishna wa Tume, Dkt. Athanas Macheyeki wa kwanza kushoto na Kaimu Afisa Mkazi wa Singida.

Muonekano wa Machimbo ya mgodi wa dhahabu wa Muhintiri kijiji cha Muhintiri wilaya ya ikungi 

Muonekano wa madini ya Jasi yakiwa yanawekwa pembeni mwa barabara ikiwa pia ni mali ya Yusufu Kibila mgodi wa General Business and Equipment Suppliers ltd 

Mjumbe wa Mgodi wa Muhintiri akieleza changamoto wanayoipata kwa Kamishna wa Tume, Athanas Macheyeki ( mwenye shati la blue) wengine ni wachimbaji wadogo pamoja na watumishi kutoka Tume ya madini.