Tuesday, April 17, 2018

Uzinduzi wa ukuta Mirerani


ü RAIS MAGUFULI ATOA AJIRA KWA VIJANA 2,038 WALIOJENGA
ü SERIKALI YATOA TSH. MILIONI 100 KWA ALIYEVUMBUA TANZANITE
ü MRABAHA KUTOKA  KWA WACHIMBAJI  WAPANDA

Na Asteria Muhozya, Mirerani

Rais wa Jamhuri ya Muungano wa Tanzania Dkt. John  Magufuli ametoa ajira kwa Vijana wa JKT 2,038 wa Operesheni Kikwete na Operesheni Magufuli, waliojenga Ukuta unaozunguka Migodi ya Tanzanite, Mirerani.

Rais Magufuli alitoa kauli hiyo wakati wa Sherehe ya Uzinduzi wa ukuta iliyofanyika eneo la geti la kuingilia ndani ya ukuta huo tarehe 6 Aprili, 2018 na kuhudhuriwa na viongozi mbalimbali wa Serikali, Vyama vya Siasa, Viongozi wa dini, waandishi wa habari na wananchi wa Wilaya ya Simanjiro mkoani Manyara na mikoa jirani.

Aliongeza kuwa, vijana hao wa JKT wameonesha uzalendo wa hali juu hivyo kuwezesha kukamilika kwa ukuta huo kwa wakati na kuongeza " mmejiuza wenyewe, sijakataa wale watakaokuwa tayari tutawatumia katika majeshi yetu yote," alisisitiza Rais Magufuli.

Pi, alitumia fursa hiyo kulipongeza Jeshi la Ulinzi la Wananchi wa Tanzania (JWTZ) ambalo lilijenga ukuta huo kupitia SUMA JKT na kuongeza kuwa, anajivunia jeshi hilo  na kwamba anajisikia furaha kuwa Mtanzania.

"Mwaka 2018, naliona Jeshi lililomtoa Nduli. Nazishukuru na kuzipongeza Wizara ya Madini kuanzia Waziri, Naibu Mawaziri, Katibu Mkuu, Kamishna na Watendaji wote na ninaishukuru Wizara ya Ulinzi na Jeshi la Kujenga Taifa na  Majeshi yote," alisema  Rais Magufuli.

Akieleza kukamilika kwa ukuta huo, Rais Magufuli alisema kuwa, umekamilika ndani ya kipindi kifupi kutokana na uzalendo mkubwa na juhudi za jeshi hilo na kusema kuwa, awali ilipangwa kukamilika ndani ya kipindi cha miezi sita lakini ulikamilika kwa muda wa miezi 3.

Akizungumzia suala la wachimbaji wadogo na kuwataka  kutokuwa na wasiwasi kutokana na kujengwa kwa ukuta na kueleza kuwa, Serikali itajenga mazingira mazuri kuhakikisha kuwa wachimbaji wote wakubwa na wadogo wananufaika na madini hayo ikiwemo Serikali.

"Hakuna kitakachoharibika. Kampuni zote zitaingia mkataba na Serikali watanunua hapa hapa na watakaouza watayauzia hapa hapa. Tutafungua mabenki, tutaanzisha utalii wa madini. Nia ya Serikali ni kuweka mazingira mazuri kwa Mirerani, Simanjiro, Manyara na hatimaye watanzania wanufaike," alisisitiza Rais Magufuli.

Akitaja faida za ukuta huo, Rais Magufuli alisema kuwa,  utaiamarisha usalama na thamani ya fedha itaonekana miongoni mwa wananchi na Taifa.

Wakati huo huo, Rais Magufuli alitoa kiasi cha shilingi millioni 100  kwa kugharimia matibabu kwa Mzee Jumanne Ngoma aliyevumbua madini hayo mnamo mwaka 1967.

Aidha,  aliwataka watanzania kuthamini mazuri yanayofanywa na watanzania kwa nchi na kuongeza kuwa, jambo hilo ni mwanzo mzuri wa kuwakumbuka mashujaa wa nchi akiwemo Mzee Ngoma aliyeweka jina la Tanzanite.

Naye, Mzee Jumanne Ngoma alimshukuru Rais Magufuli kwa kutambua mchango wake wa uvumbuzi wa madini hayo na kusema kuwa, baada ya kuona ukuta umejengwa ameona thamani ya madini ya Tanzanite ikiongezeka.

Awali, akizungumza katika sherehe hizo Waziri wa Madini Angellah Kairuki alisema kuwa, Wizara inaandaa Kanuni za Mirerani Controlled Area  za mwaka 2018 ambazo zitatoa mwongozo wa namna shughuli za uchimbaji, biashara ya madini  na huduma za jamii zitakavyoendeshwa ndani ya ukuta uliojengwa kuzunguka migodi ya Tanzanite, ambazo zitakamilishwa wiki ijayo.

Kairuki alilishukuru jeshi na kulipongeza kwa nidhamu, utii na weledi mkubwa ambao umewezesha ukuta huo kukamilika  kabla ya muda uliopangwa, na kuongeza ukuta huo umeiweka Tanzania katika Dunia  na ukombozi wa kiuchumi.

" Mhe Rais uongozi wako dhabiiti umeleta mabadiliko katika sekta ya madini. Umiliki na udhibiti wa madini haya ni nguzo muhimu na Mhe. Rais umeonesha kwa vitendo kulinda rasilimali ," alisema Kairuki.

Aliongeza kuwa, kwa miaka mingi uwepo wa madini hayo hakulinufaisha taifa ipasavyo ikilinganishwa na thamani ya madini hayo na kuongeza kuwa, udhibiti wake haukuwa mkubwa na hivyo kupekelea madini mengi kupelekewa nje ya nchi
Akizungumzia mapato baada ya kuweka udhibiti Waziri Kairuki alisema  malipo ya mrabaha kutoka mwezi Januari hadi 17 Machi, 2018 yalikuwa shilingi milioni 714.6 kwa miezi mitatu tu ambayo yamezidi  wastani wa malipo kwa miaka 2015,2016 na 2017

"Haya ni matokeo chanya ya udhibiti wa shughuli za uzalishaji katika migodi ya Tanzanite Mirerani.  Ukuta huu utaongeza zaidi uwezo wetu wa usimamizi wa rasilimali hii." alisema Waziri Kairuki.

Kwa mujibu wa maelezo ya Waziri Kairuki, Huko nyuma, malipo ya mrabaha kutoka kwa wachimbaji wa Mirerani ukiondoa Tanzanite One na STAMICO yalikuwa Shilingi 166.8 milioni kwa mwaka 2015, Shilingi 71.8 milioni kwa mwaka 2016 na Shilingi 147.1 milioni kwa mwaka 2017.

Maelekezo ya ujenzi wa ukuta huo yalitolewa na Rais wa Jamhuri ya Muungano wa Tanzania Dkt. John Magufuli, kwa Mkuu wa Majeshi ya Ulinzi ya Wananchi wa Tanzania, Jenerali Venance Salvatory Mabeyo, kujenga  uzio wa  ukuta kuzunguka mgodi wa Tanzanite Mirerani tarehe 20 Septemba, 2017 kwenye uzinduzi wa Barabara ya KIA kwenda Mirerani Wilaya ya Simanjiro Mkoa wa Manyara.

Ukuta wa mirerani una urefu wa kilomita 24.5 na umejengwa kwa kipindi cha miezi mitatu tofauti na ilivyopangwa awali  wa kujengwa miezi sita.

Uzinduzi wa ukuta ulikwenda sambamba na maonesho ya madini ya vito ambapo Shirika la Madini la Taifa (STAMICO), zilishiriki maonesho hayo, Kituo cha Jemolojia  Tanzania (TGC) pamoja na kampuni mbalimbali zinazofanya shughuli za uchimbaji na uuzaji wa madini hayo.


Rais wa Jamhuri ya Muungano wa Tanzania, Dkt. John Magufuli akikata utepe kuashirikia uzinduzi wa ukuta uliojengwa kuzunguka Migodi ya Tanzanite, Mirerani. Wa tatu kutoka kushoto ni Waziri wa Madini Angellah Kairuki. Wa pili kulia ni Waziri wa Ulinzi na Jeshi la Kujenga Taifa Dkt. Hussein Mwinyi, wa kwanza kulia ni Mke wa Rais Magufuli Mama Janeth Magufuli. Wengine wanaoshuhudia ni viongozi mbalimbali wa Serikali.
Rais wa Jamhuri ya Muungano wa Tanzania, Dkt. John Magufuli akionesha ufunguo ya mfano kuashirikia uzinduzi wa Ukuta uliojengwa kuzunguka migodi ya Tanzanite, Mirerani. Wanaoshuhudia wa kwanza kushoto ni Waziri wa Ulinzi na Jeshi la Kujenga Taifa, Dkt. Hussein Mwinyi na kulia ni Mkuu wa Mkoa wa Arusha Alexander Mnyeti.
Jiwe la Msingi lililowekwa na Rais wa Jamhuri ya Muungano wa Tanzania, Dkt. John Magufuli.
Rais wa Jamhuri ya Muungano wa Tanzania, Dkt. John Magufuli  kushoto akiteta jambo la Mzee Jumanne Ngoma (katikati) aliyevumbua Madini ya Tanzanite mwaka 1967. Kulia ni Mke wa Rais Magufuli, Mama Janeth Magufuli.

Taifa limeweka historia - Mkuu wa Majeshi


Na Asteria Muhozya, Mirerani

Mkuu wa Majeshi ya Ulinzi na Usalama Jenerali Venance Mabeyo amesema  ujenzi wa ukuta wa Mirerani umeweka Historia ambayo itadumu kwa miongo mingi.

Jenerali Mabeyo aliyasema hayo wakati akizungumza na wananchi wakati wa sherehe ya Uzinduzi wa ukuta unaozunguka migodi ya Tanzanite Mirerani uliofanyika tarehe 6 Aprili,2018.

Alisema kuwa, utayari wa Jeshi na vijana wa JKT umeonesha taaluma zote  huku vijana 2,038 waliojenga ukuta huo wakiwa alama ya uzalendo kwa Taifa la Tanzania.

Jenerali Mabeyo aliongeza uwezo wa jeshi wa kutumia wataalam wake wa ndani na kufanya kazi kwa moyo kumepelekea mafanikio ya ujenzi wa ukuta huo  na hivyo, kuwataka watanzania wote kujivunia nchi yao, kulinda rasilimali zote za nchi ikiwemo madini na amani ya taifa.

Pia, alisema kuwa, nidhamu ya jeshi imezingatia weledi, uharaka jambo ambalo limepelekea shughuli hiyo kufanyika kwa kipindi kifupi.
" Daima tuko imara kulinda Katiba ya Jamhuri ya Muungano wa Tanzania na utu wetu ndiyo nguzo kubwa,"alisema Jenerali Mabeyo.

Jenerali Mabeyo alitumia fursa hiyo kuwashukuru wananchi wa Mirerani kwa ushirikiano mkubwa walioutoa kwa Jeshi hilo kwa kipindi chote cha ujenzi wa ukuta huo na kueleza kuwa, ushirikiano huo umeoneshwa na watanzania wapenda maendeleo.

Alisema kuwa, ukuta huo umejengwa na wahandisi wa ujenzi kutoka JKT, JWTZ wakiwemo Maafisa 34, Askari 287 na Vijana 2,038 wa Operesheni Kikwete na Opereshi Magufuli.

"Mheshimiwa Rais inawezekana  kuna watu wakaona kuwa shilingi bilioni 5.645,843,163.55 ni nyingi sana lakini baada ya rasilimali hizi kutumika kikamilifu  huenda fedha hizi zikawa kidogo. Hii ndiyo nguvu kazi ya Watanzania na uwezo wa Jeshi letu," alisema Jenerali Mabeyo.

Kwa upande wake, Waziri wa Ulinzi na Jeshi la Kujenga Taifa  Dkt. Hussein Mwinyi, alisema kuwa  ujenzi wa ukuta huo unadhihirisha ulinzi wa rasilimali za nchi na kuwa umeweka historia mpya.

Dkt.Mwinyi alitumia fursa hiyo kuwashukuru wananchi wa Mirerani kuwapokea vizuri wanajeshi  na pia kuwashukuru vijana wa JKT kwa namna walivyojituma na hatimaye kufanikisha ujenzi huo.

Pia,  Waziri  Dkt. Mwinyi alisema kuwa, jeshi litaendelea kuwa imara  na makini katika kutekeleza maagizo na majukumu yake wakati wote.


Rais wa Jamhuri ya Muungano wa Tanzania Dkt. John Magufuli akipokea hati ya ukuta kutoka kwa Waziri wa Ulinzi Jeshi la Kujenga Taifa, Dkt. Hussein Mwinyi akizungumza jambo wakati wa Sherehe ya Uzinduzi wa ukuta kuzunguka Migodi ya Tanzanite, Mirerani.



Waziri wa Ulinzi na Jeshi la Kujenga Taifa, Dkt. Hussein Mwinyi akizungumza jambo wakati wa Sherehe ya Uzinduzi wa ukuta kuzunguka Migodi ya Tanzanite, Mirerani.



Mkuu wa Majeshi ya Ulinzi na Usalama Jenerali Venance Mabeyo akizungumza jambo wakati wa Sherehe za uzinduzi wa ukuta kuzunguka mgodi wa Tanzanite, Mirerani.



Mkuu wa Majeshi ya Ulinzi na Usalama Jenerali Venance Mabeyo (kulia) akiteta jambo na Mkuu wa Jeshi la Kujenga Taifa (JKT) Meja Jenerali Martin Busungu (kulia) wakati wa sherehe ya uzinduzi wa ukuta kuzunguka mgodi wa Tanzanite, Mirerani.

Ujenzi wa ukuta umefanyika kwa ubora-Meja Jenerali Busungu


Na Asteria Muhozya, Mirerani

Mkuu wa Jeshi la Kujenga Taifa (JKT) Meja Jenerali Martin Busungu amesema kuwa ujenzi wa ukuta  unaozunguka Migodi ya Tanzanite Mirerani wenye urefu wa kilomita 24.5, umefanyika kwa ubora na viwango vya juu.

"Vijana wamefanya kazi kwa uzalendo wa hali ya juu na kujitolea. Tumetekeleza kwa ukamilifu weledi na chini ya muda uliopangwa," alisisitiza Meja Jenerali Busungu.

Meja Jenerali Busungu aliyasema hayo wakati wa sherehe za uzinduzi wa ukuta huo uliofanyika tarehe 6 Aprili, 2018, eneo la geti la kuingilia ukuta huo Wilaya ya Simanjiro Mkoa wa Manyara na kuongeza kuwa, ujenzi wake umegharimu shilingi bilioni 5.645,843,163.55.

Meja Jenerali Busungu aliongeza kuwa, matokeo ya ujenzi huo kuwa na ubora na kuchukua kipindi kifupi yalitokana na uadilifu mkubwa wa jeshi na hilo linaonesha kuwa, kazi ya Jeshi si  tu kulinda mipaka, Katiba ya nchi  bali pia kujenga nchi ya Tanzania na kuhakikisha kuwa, rasilimali za zinakuwa salama kwa vizazi vijavyo.

Aidha, alitumia fursa hiyo kuwapongeza wananchi na wenyeji wa mji wa Mirerani kwa kutoa historia ya eneo hilo ikiwemo mapitio ya maji na njia za wanyama jambo ambalo liliwezesha jeshi hilo kutekeleza majukumu yake kikamilifu.

Pia, alisema kuwa, ukuta huo ulijengwa na vikosi 20 vya jeshi vikijumuisha wataalam wa ujenzi, Wahandisi, Vijana wa JKT wa Operesheni Kikwete na Operesheni Magufuli na Watumishi wa umma.


Mkuu wa Jeshi la Kujenga Taifa (JKT) Meja Jenerali Martin   Busungu akiongea jambo wakati wa sherehe ya uzinduzi wa Ukuta kuzunguka migodi ya tanzanite Mirerani
Vijana wa JKT wakiendelea na ujenzi wakati wa hatua mbalimbali za ujenzi wa ukuta kuzunguka Migodi ya Tanzanite Mirerani.

Vijana wa JKT wakiendelea na ujenzi wakati wa hatua mbalimbali za ujenzi wa ukuta kuzunguka Migodi ya Tanzanite Mirerani.

Thursday, March 29, 2018

Tanzania yaendelea kutekeleza malengo ya ICGLR

Na Mohamed Saif,

Serikali ya Tanzania imesema inaendelea kutekeleza malengo na makubaliano mbalimbali ya Mpango wa Ukanda wa Maziwa Makuu (ICGLR) ili kuleta tija kwenye shughuli za madini kwa Nchi Wanachama.

Mkuu wa Mkoa wa Arusha, Mrisho Gambo alisema hayo Machi 27, 2018 wakati wa ufunguzi wa Mkutano wa siku mbili wa Kikanda wa Wataalam wa Madini ya Dhahabu katika Ukanda wa Maziwa Makuu (ICGLR Regional Gold Expert Meeting) uliofanyikia Jijini Arusha.

Gambo alisema Tanzania imekuwa Mwanachama rasmi wa ICGLR Mwaka 2008 na kwamba tangu wakati huo imeendelea kutekeleza malengo ya mpango wa ICGLR ili kufanikisha udhibiti wa uvunaji haramu wa madini na kuhakikisha manufaa ya pamoja ya rasilimali husika yanapatikana kwenye Nchi Wanachama.

Malengo ya ICGLR ni kuwianisha sheria za nchi wanachama ili kuweka uwiano katika sheria za kudhibiti uvunaji haramu wa madini, kuwa na hati moja ya usafirishaji madini ya Tin, Tantalum, Tungsten (3TG) na dhahabu ili kuhakikisha kuwa madini hayo yanachimbwa na kutumika kihalali na kurasimisha shughuli za wachimbaji wadogo.

Malengo mengine ya ICGLR ni kuongeza ushiriki wa wanawake katika shughuli za uchimbaji madini, kuimarisha uwazi na uwajibikaji na kuwa na mfumo wa kanzidata utakaowezesha kufuatilia taarifa za uvunaji, usafirishaji na uuzaji wa madini.

Katika kutambua malengo hayo, Gambo alisema Nchi Wanachama wanao wajibu wa pamoja kuhakikisha malengo waliyojiwekea yanafikiwa kwa manufaa ya wanachama wote.

Gambo alizungumzia changamoto mbalimbali zinazozikabili Nchi Wanachama ambazo ni pamoja na uvunaji haramu wa madini, utoroshwaji wa madini, uharibifu wa mazingira, ukosefu wa teknolojia na baadhi ya Nchi kuwa na changamoto za Kiusalama.

Hata hivyo alisema changamoto hizo zisiwe sababu ya kurudi nyuma badala yake juhudi za pamoja, mshikamano wa dhati unahitajika ili kukabiliana nazo na kuhakikisha zinatatuliwa.
"Ni jukumu letu sote kwa pamoja kuhakikisha tunafikia malengo bila kurudi nyuma hasa ikizingatiwa changamoto tunazokabiliana nazo ni nyingi na hatupaswi kukata tamaa wala kurudi nyuma," alisema.

Akizungumzia hali ya uchimbaji dhahabu nchini, Gambo alisema hivi sasa Tanzania inashika nafasi ya Nne Barani Afrika na kwamba juhudi mbalimbali zinaendelezwa za kurasimisha uchimbaji mdogo. Hata hivyo alisema changamoto kuu iliyopo ni utoroshaji wa madini hayo ambayo Serikali inaendelea kukabiliana nayo.

Gambo alielezea mabadiliko mbalimbali yanayoendelea kufanyika kwenye Sekta ya Madini nchini ikiwemo mabadiliko ya Sheria ya Madini kwa lengo la kuhakikisha Watanzania wananufaika na rasilimali madini.


Mkuu wa Mkoa wa Arusha, Mrisho Gambo akifungua rasmi Mkutano wa Wataalam wa Madini ya Dhahabu wa Jumuiya ya Nchi za Maziwa Makuu (ICGLR).



Wataalam wa Madini ya Dhahabu kutoka Nchi za Ukanda wa Maziwa Makuu ICGLR wakiendelea na majadiliano Jijini Arusha.

Wednesday, March 28, 2018

Wataalam wa madini ya dhahabu Nchi za Ukanda wa Maziwa Makuu (ICGLR) wakutana Arusha


Na Mohamed Saif,

Wataalam wa Madini ya Dhahabu kutoka Nchi za Ukanda wa Maziwa Makuu ICGLR wamekutana Jijini Arusha ili kujadili masuala mbalimbali yanayohusu madini hayo kwa maslahi mapana ya nchi hizo.

Mkutano huo wa siku mbili ulifunguliwa jana Machi 27, 2018 na Mkuu wa Mkoa wa Arusha, Mrisho Gambo ambapo alisisitiza kuwa Nchi Wanachama wa ICGLR wanao wajibu wa pamoja kuhakikisha malengo waliyojiwekea yanafikiwa kwa manufaa ya wanachama wote.

Gambo alizungumzia changamoto mbalimbali zinazozikabili Nchi Wanachama ambazo ni uvunaji haramu wa madini, utoroshwaji wa madini, uharibifu wa mazingira, ukosefu wa teknolojia na baadhi ya Nchi kuwa na changamoto za Kiusalama.

Hata hivyo alisema changamoto hizo zisiwe sababu ya kurudi nyuma badala yake juhudi za pamoja, mshikamano wa dhati unahitajika ili kukabiliana na changamoto hizo na kuhakikisha ufumbuzi unapatikana kwa maslahi mapana ya Nchi za Ukanda wa Maziwa Makuu.

Nchi Wanachama ni Tanzania, Angola, Burundi, Jamhuri ya Afrika ya Kati, Congo (Kinshasa), Congo (Brazzaville), Kenya, Rwanda, Sudan Kusini, Sudan Kaskazini, Uganda na Zambia.

Tanzania imekuwa Mwanachama rasmi wa ICGLR Mwaka 2008 na tangu wakati huo imeendelea kutekeleza malengo ya mpango wa ICGLR ili kufanikisha udhibiti wa uvunaji haramu wa madini na kuhakikisha manufaa ya pamoja ya rasilimali husika yanapatikana. 


Baadhi ya Waratibu wa Mkutano wa Wataalam wa Madini ya Dhahabu kutoka Nchi za Ukanda wa Maziwa Makuu ICGLR wakifuatilia majadiliano kwenye mkutano huo Jijini Arusha. Kulia ni Mkurugenzi wa Demokrasia na Utawala Bora- ICGLR, Balozi Ambeyi Ligabo akifuatiwa na Mwenyekiti wa Mkutano, Service Julie kutoka Congo.

Wataalam wa Madini ya Dhahabu kutoka Nchi za Ukanda wa Maziwa Makuu ICGLR wakiendelea na majadiliano.

Baadhi ya Washiriki wa Mkutano wa Wataalam wa Madini ya Dhahabu kutoka Nchi za Ukanda wa Maziwa Makuu ICGLR wakifuatilia majadiliano

Mwenyekiti wa mkutano, Service Julie kutoka Congo (wa pili kulia) akizungumza wakati wa Mkutano wa Wataalam wa Madini ya Dhahabu kutoka Nchi za Ukanda wa Maziwa Makuu ICGLR. 

Washiriki kutoka Tanzania wakifuatilia majadiliano kwenye mkutano huo. Kutoka kulia ni Kamishna Msaidizi wa Madini Kanda ya Kaskazini, Adam Juma akimwakilisha Kamishna wa Madini, Prof. Shukran Manya na Mhandisi Fadhili Kitivai (kutoka Wizara ya Madini). 
Wataalam wa Madini ya Dhahabu kutoka Nchi za Ukanda wa Maziwa Makuu ICGLR wakiendelea na majadiliano Jijini Arusha.

Naibu Waziri Biteko-Ukuta wa Mirerani utaweka rekodi Afrika


Na Asteria Muhozya, Mirerani

Naibu Waziri wa Madini Doto Biteko amesema Ujenzi wa Ukuta kuzunguka Migodi ya  Mirerani ni jambo la Kihistoria na kwamba linatarajiwa kuweka rekodi Barani Afrika.

Naibu Waziri Biteko aliyasema hayo tarehe 23 Machi, wakati wa kikao cha Maandalizi ya Uzinduzi wa Ukuta huo unaotarajiwa kuzinduliwa mapema mwezi Aprili na Rais wa Jamhuri ya Muungano wa Tanzania Dkt. John  Magufuli.

Aliongeza kuwa, ukuta huo ni jambo ambalo watanzania wamelisubiri kwa miaka mingi licha ya kuwepo kwa mapendekezo na sasa hatua zimechukuliwa na kutekelezwa.

Pia alilipongeza Jeshi kwa nidhamu kubwa ambayo limeonesha kwa ujenzi wa ukuta huo  wenye urefu wa kilomita 25.4  na ambao ujenzi wake umechukua kipindi cha miezi 3 tofauti na ilivyopangwa.

Kwa upande wake Mkuu wa Mkoa wa Manyara, Alexander Mnyeti, alilipongeza Jeshi kwa kazi ambayo imefanyika na kuwataka Wajumbe wa Kamati kukamilisha utekelezaji wa majukumu yote kwa wakati.

Kikao hicho kilihudhuriwa na Mkuu wa Mkoa wa Manyara Alexander Mnyeti, Naibu Waziri wa Madini Doto Biteko, Mkuu wa Wilaya ya Simanjiro Zephania Chaula, Kamati ya Ulinzi na Usalama ya Mkoa wa Manyara na Wilaya ya Simanjiro, Wizara ya Madini,  Wizara ya Ulinzi na Jeshi la Kujenga Taifa, Jeshi la Ulinzi la Wananchi wa Tanzania (JWTZ ) Jeshi la Kujenga Taifa (JKT) , Shirika la Umeme Tanzania (TANESCO - Manyara) na Wakala wa Barabara ( TANROAD)


Naibu Waziri wa Madini Doto Biteko (kulia), akimsikiliza        Mkuu wa Mkoa wa Manyara Alexander Mnyeti mara baada ya kikao cha Maandalizi ya Uzinduzi wa Ukuta wa Mirerani.

Mkurugenzi wa Utawala na Rasilimaliwatu Issa Nchasi, (wa pili kulia) wakibadilishana jambo na baadhi ya wajumbe wa Kamati ya Maandalizi ya uzinduzi wa Ukuta wa Mirerani.

Mkurugenzi wa Utawala na Rasilimaliwatu Issa Nchasi akimweleza jambo Naibu Waziri wa Madini Doto Biteko mara        baada ya kikao cha maandalizi.

Baadhi ya Wajumbe wa Kamati ya Ulinzi na Usalama ya        Mkoa  wa Manyara na Wilaya ya Simanjiro wakibalishana     jambo.

Monday, March 26, 2018

Madini ya ujenzi, viwanda yanachangia zaidi kwenye uchumi kupita mengine – Biteko


Ø Yachangia bilioni 7.1 mrabaha 2016/17

Ø Asema usimamizi mzuri unaweza kukuza mchango huo kufikia bilioni 15 kwa mwaka

Na Veronica Simba, Dodoma

Naibu Waziri wa Madini Doto Biteko, amesema kuwa madini ya ujenzi na viwanda yanaipatia Serikali fedha nyingi kupita aina nyingine zote za madini yanayopatikana nchini.

Akizungumza na wafanyakazi wa Ofisi ya Madini Dodoma, Machi 22 mwaka huu akiwa kwenye ziara ya kazi, Biteko alisema kuwa takwimu za makusanyo ya Serikali zinabainisha hayo.

“Mfano mwaka 2016/17, takribani tani milioni 15.6 za madini ya ujenzi zilizochimbwa, zilizalisha shilingi bilioni 230.6; ambapo katika hiyo, ulipatikana mrabaha wa shilingi bilioni 7.1,” alisema.

Akifafanua zaidi, Naibu Waziri Biteko alieleza kuwa, idadi ya wachimbaji wa dhahabu na madini mengine nchi nzima ikijumlishwa, haiwezi kufika hata robo ya wale wanaofanya shughuli za madini ya ujenzi nchini.

Alisema kuwa Serikali imejipanga kuhakikisha inaongeza vituo vya madini ya ujenzi na viwanda kutoka 85 vilivyopo sasa nchi nzima hadi kufikia 174. “Nina uhakika tukiviongeza vituo kufikia idadi hiyo, tutakusanya mrabaha wa zaidi ya shilingi bilioni 15 katika madini hayo pekee.”

Katika hatua nyingine, Naibu Waziri alitoa wito kwa wakandarasi wote wanaotekeleza miradi mbalimbali hususan ya ujenzi wa barabara kuhakikisha wanatimiza wajibu wao kwa kuzingatia sheria ya madini inayomtaka kila mtu aliyepewa leseni kulipa tozo na kodi mbalimbali ambazo zimeelekezwa na sheria hiyo.

Alisema, Serikali haiwezi kukubali kuona mtu yeyote anafanya kazi ya ujenzi, amelipwa fedha na Serikali lakini yeye kwa upande wake hataki kulipa kiasi ambacho anapaswa kuilipa Serikali.

“Kama tuna watanzania ambao ni maskini na tunachukua mrabaha kwao, halafu kampuni kubwa yenye mtaji mkubwa, inayoendesha shughuli za ujenzi, iache kulipa kodi stahiki; hiyo haikubaliki,” alisisitiza.

Biteko alisema kuwa, Wizara ya Madini itaandaa utaratibu wa kukutana na kujadiliana na Wakala wa Barabara Tanzania (Tanroads), ambao ndiyo hupewa leseni kwa mujibu wa sheria, kuhusu namna bora ya kusimamia suala husika ili madeni yaliyopo yalipwe.

Maagizo hayo ya Naibu Waziri Biteko yalikuja kufuatia ripoti iliyosomwa kwake na Afisa Madini Mkazi Dodoma Silimu Mtigile, kuwa ofisi yake inakabiliwa na changamoto ya ukusanyaji mirabaha inayotokana na wakandarasi wa barabara.

“Katika miradi mikubwa ya barabara iliyopo Dodoma, ulipwaji wa mirabaha ya madini ujenzi kutoka kwa wakandarasi umekuwa wa kusuasua ambapo hadi sasa kiasi cha shilingi 642,632,195.00 kimekusanywa, sawa na asilimia 33.11 kati ya jumla ya shilingi 1,941,177,853.23 zinazopaswa kulipwa,” alisema Mtigile.

Aliitaja miradi hiyo ya barabara kuwa ni barabara ya Dodoma kwenda Iringa, iliyotekelezwa na Kampuni ya CCCC, barabara ya Dodoma mjini hadi Mayamaya iliyotekelezwa na Kampuni ya Sinohydro; ambazo zote mbili zimekamilika pamoja na barabara kutoka Mayamaya hadi Mela inayotekelezwa na Kampuni ya CHICO inayotarajiwa kukamilika baada ya muda mfupi.

Naibu Waziri alisema kuwa, Wizara itaisimamia sheria ya madini katika kuhakikisha kila madau anatimiza wajibu wake ipasavyo. Aidha, aliiagiza Ofisi hiyo ya Madini Dodoma, kuhakikisha wanaendelea kufuatilia malipo husika na kutokuruhusu mitambo ya wakandarasi wanaodaiwa, iliyoko eneo la kazi, kuchukuliwa hadi pale watakapokamilisha malipo yao.

Aliwataka watumishi wote wa sekta ya madini kufikiria namna gani sekta hiyo itafanikiwa kuongeza mchango wake katika Pato la Taifa. Pia, aliwakumbusha kuwa, mojawapo ya kazi kubwa ya Wizara ni pamoja na kuwalea wachimbaji wadogo waliopo ili wakue.

“Tusifanye kazi za kukamata tu. Tufanye kazi kubwa ya kuwalea watu hawa ili wafuate sheria. Ukiwafundisha wakafuata sheria, utatumia nguvu ndogo sana kuwakamata, kwa sababu watakuwa ni watu wenye uelewa tayari,” alisisitiza.

Katika taarifa yake kwa Naibu Waziri; Mtigile alibainisha mojawapo ya mafanikio makubwa ya Ofisi yake kuwa ni pamoja na ongezeko la ukusanyaji wa maduhuli mwaka hadi mwaka, ambapo kwa mwaka wa fedha 2016/17, lengo la kukusanya maduhuli lilikuwa jumla ya shilingi 1,200,000,000. Alisema Ofisi ilifanikiwa kutimiza lengo kwa kukusanya shilingi 1,444,100,922.00 sawa na asilimia 120.34.

Aidha, alibainisha kuwa lengo la mwaka 2017/18 ni kukusanya jumla ya shilingi 1,230,000,000.00; ambapo hadi kufikia Februari 28 mwaka huu, Ofisi yake imekusanya jumla ya shilingi 812,384,840.98 sawa na asilimia 66.05. Alisema kuwa, katika pesa hizo, makusanyo ya mirabaha ya madini pekee ni jumla ya shilingi 621,329,912.38 sawa na asilimia 76.

Kwa upande wake, Naibu Waziri Biteko pamoja na kuipongeza ofisi ya madini Dodoma kwa jitihada na mafanikio iliyopata; alizungumzia makusanyo ya maduhuli kwa nchi nzima kuwa yanaleta matumaini baada ya mabadiliko ya sheria ya madini.

“Sheria hii tulipoibadilisha, imeongeza msukumo mkubwa kwenye usimamizi wa sekta na hivyo, kwa sasa ukusanyaji wa maduhuli umekuwa mzuri sana ukilinganisha na miaka iliyopita.”

Akitoa mfano, alisema kuwa, mathalani mwezi Februari mwaka huu, makusanyo yalikuwa zaidi ya asilimia 85. Alisema anaamini Wizara yake itavuka lengo ililowekewa la shilingi bilioni 250 kutokana na uwepo wa sheria hiyo nzuri inayosaidia kusimamia vizuri mapato ya serikali.


Naibu Waziri wa Madini Doto Biteko, akisalimiana na wafanyakazi wa Ofisi ya Madini Dodoma, alipowasili katika Ofisi hiyo akiwa katika ziara ya kazi, Machi 22 mwaka huu.


Baadhi ya wafanyakazi katika Ofisi ya Madini Dodoma, wakimsikiliza Naibu Waziri wa Madini Doto Biteko (hayupo pichani), alipotembelea ofisi hiyo na kuzungumza na wafanyakazi Machi 22 mwaka huu. Kutoka kushoto ni Halima Kikoti, Affa Edward Affa na Betilda Kirway.


Shughuli za uchimbaji madini ya nakshi zikiendelea katika Mgodi uliopo Ntyuka Dodoma, wakati wa ziara ya Naibu Waziri wa Madini Doto Biteko (hayupo pichani) mgodini hapo Machi 22 mwaka huu.


Naibu Waziri wa Madini Doto Biteko, akikagua tarazo zilizotengenezwa na mawe ya nakshi katika mgodi uliopo Ntyuka Dodoma, wakati wa ziara yake Machi 22 mwaka huu.


Naibu Waziri wa Madini Doto Biteko na Ujumbe aliofuatana nao, wakikagua maeneo ya uchimbaji wa madini ya dhahabu yaliyopo kijiji cha Nholi wilayani Bahi, Machi 22 mwaka huu.


Sehemu ya shehena ya mawe ya nakshi aina ya Graphite. Taswira hii ilichukuliwa Machi 22 mwaka huu wakati wa ziara ya Naibu Waziri wa Madini Doto Biteko (hayupo pichani) katika Mgodi uliopo Itiso wilayani Chamwino.